الصمت/ علي مسلم عجمي
( الصمت ) .للشاعر الدكتور علي مسلم عجمي
------------------------
الصمت فن و مين يعرف يرسمو
فوق اللسان و قِدِر كيف يجسِّمو
كثرة كلامك ما بتقدر تحسمو
أغلاط بقيو من الحروف ينسمو
و تا تصير فنان بتعابير الكلام
خللي شفافك بالصمت يتبسمو
الصمت مِتعِب في زمان الثرثرة
ما ندمت عسكوتي ..عطاني مفخرة
كتر الحكي الفاضي بلا داعي مسخرة
بتتورط و ممكن ياخذك عالمقبرة
بتندم على كتر الكلام الما يفيد
ثرثار حكيو لا انباع و لا انشرى
بتشرح و لما الحكي ما فهمو حدا
مهما تحاليلك صِدِق منها بدا
بتشعر كلامك راح عالفاضي سُدى
ما في ثقافة و فِكر بيرد الصدى
بهيك حالة الصمت أوجب من كلام
يسببلك الإيذاء و يجيب الردى
كم مرة تأملت قلبي الحزين
وقت اللي كان الصمت عشق المغرمين
لقلوب ما بتعرف تواطؤ بالحنين
بتنسحِب في صمت مع حسرة و أنين
و ساعة التعبير يجمد عاللسان
بيبقى كلامي صامت بقلبي دفين
أوقات بيكون الصمت أبلغ كلام
سكون هادي بلاغة و إنسجام
انعزفت على أوتار مع أبدع مقام
بتخترعها و لحن ترنيمة غرام
بجلسة غزل أجمل كلام بوصِّلو
و أوقات بيكون الصمت عشق و غرام
ورد البنفسج فوق خدك متكي
جالس يغني ليلكي عالليلكي
و عيون كتر الشوق ذوبها البِكي
رسايل غرامية بلهفة تشتكي
لكن البسمة الصامتة فوق الشفاف
صمتها أكتر بلاغة من الحكي
مجازر كتيرة ما بينعدّو
عا جثث دبابات..بيعدو
و أجساد شوف تغيرت أوصافها
أشلاء عن هاك الجسد بُعدو
في ناس رفعت بالكلام هنافها
و ناس جوّا قصورها قعدو
اللي بيصمت عن مجازر شافها
شيطان أخرس هيك منعدو
الشاعر د. علي مسلم عجمي
لبنان
تعليقات
إرسال تعليق